Víctor Senra e David Vázquez impuxéronse un ano máis no Rallye Cidade de Narón, pero non o tiveron nada doado, xa que a dupla coruñesa formada por Iago Caamaño e Alberto Rodríguez plantaron batalla e o vibrante pulso que mantiveron ó longo da proba os dous Ford Fiesta R5 será recordado por tódolos siareiros que tiveron a sorte de presenciala en directo, desfrutando dunha condución ao límite, ao tempo que se alternaban ao frente da clasificación sucesivamente, e rematando por unha escasa diferencia de 1 segundo e 681 milésimas, un suspiro, nos máis de 111 Kms cronometrados que compoñían a carreira.
O chanzo máis baixo do podio foi para o Mitsubishi Lancer Evo X de Alberto Meira e José Murado, lastrados por un furo que non lles impediu manter á marxe aos locais Pablo Rey e Luis Hernández na estrea do seu novidoso Suzuki Swift R+ N5, cuarto clasificado. Quinto da xeral e vencedor da Copa TopTen A foi o Renault Clio R3 de Jorge Pérez e Juan Gándara, quenes superaron aos irmáns Tino e Jorge Iglesias no seu Ford Fiesta N5 por tan só 2,3 segundos. A continuación, sétimos clasificados scratch e os mellores na TopTen B foron Dani Castro e Sergio Martínez quenes se volvían a poñer aos mandos dun Peugeot 208 R2 de aluguer.



Os outros protagonistas desta edición, e por méritos propios, foron Jorge Cagiao e Amelia Blanco, quenes se anotaron o mellor crono nos 4 treitos da mañá entre os participantes no VolanteFGA-PXP19, sendo capaces de administrar a renta acumulada para conter o ataque de Dani Berdomás, copilotado nesta ocasión por Álvaro Muñiz, que malia ser o máis rápido nas outras 4 especiais finalizou a case 7 segundos dos gañadores. A exihibición realizada por estes dous equipos levounos a ser oitavos e novenos clasificados respectivamente a bordo de sendos Peugeot 106 GTI de escasa preparación, tal como rixe a normativa dese certame.



En canto á Copa AMF, Rubén Gandoy e Sergio Díaz acadaron unha cómoda victoria que lles permite meterse de cheo na loita polo campionato neste trofeo. Finalizaron decimoterceiros entre os 82 equipos (dos 137 que tomaron a saída) que compoñen a CLASIFICACIÓN FINAL.

Como non podía ser de outra maneira, queremos agradecer o responsable comportamento que en esta ocasión mostrou o público asistente, así como a tódolos concellos, institucións, empresas e colaboradores que fixeron posible levar a bo termo esta edición da clásica naronesa.

Para non perder detalle do que acontece ó longo da xornada, teñen diferentes posibilidades de manterse informados:

A máis emocionante, para os que se acheguen ás bisbarras de Ferrolterra, Eume e Ortegal, sería a de sintonizar CADENA DIAL RÍAS ALTAS (98.5 FM) que realizará un especial ó longo do día con entrevistas a pé de treito como é costume.

Se o que desexan é levar a conta dos tempos de cada piloto ou da súa clasificación, poden facelo a través da web TemposFGA.

E como non podía ser de outra maneira, dende a organización trataremos de ter información real e instantánea a través das nosas redes sociais, tanto na conta de Facebook como na de Twitter.

Un total de 17 equipos son os que formalizaron a súa inscrición no treito de probas que se realizará mañá venres.

A mellor maneira de poñer a punto os reglaxes dos seus coches e coller ritmo de cara a competición do sábado. Para todos aqueles que desexen achegarse a presencialo, deixamos unha básica Guía con información onde figura a lista de inscritos así como un detallado mapa.

Complemento Nº1 - Modificación Reagrupamento de Mediodía

Complemento Nº2 - Cadro de Oficiais

Complemento Nº3 - Responsable das Relacións cos Participantes

Complemento Nº4 - Publicidade Facultativa

Xa podedes descargar na sección de Espectadores o Mapa Xeral do rallye, así como a Guía do Espectador con mapas individuais de cada especial e as descripicóns para poder acceder a elas ou o Mapa para Google Earth para examinar con maior o percorrido.

Neste último caso, figuran en cor azul varias estradas nas que estará PROHIBIDO ESTACIONAR ao ser Percorridos de Evacuación de Feridos.

Publicamos a Lista de Inscritos do 31º Rallye Cidade de Narón.

Un listado encabezado por Víctor Senra, Iago Caamaño e Alberto Meira, principais protagonistas do Campionato, aos que se unirá Javier Pardo co seu Suzuki Swift R+ N5. Con igual montura, aínda que con estética renovada tomará a saída Pablo Rey, sendo unha das principais novidades ó igual que a estrea de Adrián Gil cun Mitsubishi Lancer Evo X ou o tan agardado Citroën Xsara Kit Car de Ramiro González.

Como non podía ser de outra maneira, as copas TopTen, VolanteFGA e AMF nutrirán e darán emoción a unha numerosa carreira onde os pilotos locais tratarán de destacar.

Na víspera do rallye, o venres 22 de xuño, organizarase un Treito de Probas para que os participantes na carreira podan adecuar os reglaxes das súas monturas a este tipo de estradas ou simplemente coller ritmo.

Consistirá nunha especial de apenas 2,9 kms pero moi completa e técnica, resultando un bo resumo do que se atoparán ao día seguinte.

Estará emprazada nas proximidades da Feira do Trece, en Narón, tendo unha conexión moi cómoda dende o Parque de Traballo e se habilitará para tal fin de 11 a 13 horas.

O custo da inscrición é de 165€ aceptando a publicidade proposta polo organizador. En caso de non facelo o prezo ascenderá a 330€.

Mañá, venres 25 de maio, a partir das 10:00 horas, queda aberto o prazo de inscrición aos PILOTOS INSCRITOS no Campionato de Galicia de Rallyes de Asfalto 2018 para poder formalizar a súa inscrición no XXXI Rallye Cidade de Narón.

O resto de participantes deberán agardar ata o vindeiro luns, día 28 de maio para poder facelo.

Recordamos que para considerar unha inscrición como válida o participante interesado deberá facer chegar tanto os datos correspondentes ao equipo que se solicitan como o xustificante do ingreso. O número máximo de inscritos fíxase en 150, quedando en lista de reservas os que non acadaran praza na lista inicial.

Para inscribirse, poden cubrir o Formulario de Inscrición da FGA, e remitir o xustificante de ingreso bancario a correo@rallyenaron.org

A data límite para inscribirse será o mércores 13 de xuño ás 20:00 horas.

Problemas administrativos nos obrigan a retrasar a celebración da carreira unha semana, prevista inicialmente para os días 15 e 16, quedando así aprazada para o seguinte fin de semana, venres 22 e sábado 23 de Xuño.

Este imprevisto ocasiona, malia tódolos esforzos de Concello e Escudería, o ter que anular o Treito Espectáculo da xornada do venres, ao non ter marxe de maniobra coa programación dos diversos eventos e espectáculos que promove o Concello e Narón, gran impulsor e colaborador do Rallye que leva o seu nome. Con isto, as verificacións realizaranse pola tarde, tal como se mostra no novo Programa Horario.

Lamentamos profundamente as molestias que este inesperado cambio de data poda ocasionar a participantes e siareiros.

O XXXI Rallye Cidade de Narón constará dun percorrido total de 383,710 quilómetros, dos cales 112,560 corresponden a 9 Treitos Cronometrados.

A carreira conta co Permiso de Organización número GA-015-RA, expedido pola Federación Galega de Automobilismo, e será a cuarta cita puntuable para o Campionato de Galicia de Rallyes de Asfalto 2018.

Poden consultar xa o Regulamento Particular na Sección de Participantes.